Armãnã
Anglicheashti
Mucãneashti
Consiliul a Tinirlor Armãnji Frandza ufitsiala a tinirlor armanji
Dzuua Natsionalã a Armãnjlor 2012
Pirmithlu a Armãnjlor. Calea cãtã Crushova
Estanu, tu 23 di Maiu, ti Dzuua Natsionalã a Armãnjlor, va nã turnãm tu chiro, ti unã adutseari aminti a isturiei a noasti, a adetslor, ama sh-a cãnticlui armãnescu. Deadun va s-duchimãsim s-trãdzem “zãvonlu” tsi anvãleashti fara a noastã, ta sã scutem tu migdani atseali misidz tsi u aspun: zãrtsina strãveaclji, achicãsearea tra di noi ama sh-cu alanti millets, adetsli ti-anami, putearea sh-tãcatea cu cari putum s-bãnãm totna tu iutsido locu nã pimsi isturia.
Ashi va s-ahurheascã pirmithlu tsi va s-dizvãrteascã tu 23 di Maiu 2012.
Va s-hits cãlisits sh-ashtiptats cu uspitsãljea safe armãneascã tu casitsili msheati sh-uidisitu adrati, tsi va vã hãrseascã mutrita. Cara s-avets vreari ti isturii, culturã sh-adets, cara s-avets antribãri sh-cãftats apandisi i cara s-avets mash perieryii, va s-hibã aclo oaminji cu cari s-adrats muabeti. Tutnãoarã, va s-putets s-videts fisea ditu vecljili hori armãneshtsã, cu muntsãi, casili sh-cupiili di oi tsi “anyrãpsirã” unã ‘ntreagã isturii.
Sh-di cara adusim aminti isturia, cultura sh-adetsli, vã dimãndãm cã tu atseali 4 dzãli di dizvãrteari a evenimentului, va s-putets s-vã hãrsits cu 4 turlii di activitãts. Prota sh-prota, va s-videts un shcurtu documentar – ditu cari va s-aflats lucri tsi tsãnu di isturia a noastã-, va s-videts unã piesã di teatru giucatã pi armãneashti, va s-aflats cama multi di poetslji a noshtsã sh-di “calea” a poematiloru anyrãpsiti pi limba di dadã shi -nu dip tu soni-, va s-hits cãlisits la un cenaclu cu cãnticu sh-giocu. La aestu cenaclu, va s-poatã s-hibã anvitsati ‘ndauã murafets tsi tsãnu di muzicã (vocal/instrumental) ama sh-di gioclu armãnescu. Vã ashtiptãmu tu Parcul Herãstrãu (intrata Charles de Gaulle), ta s-nã hãrsim shi s-u bãnãm deadun aestã hãrseari.
